Samd um at gera fríhandilsavtalu

Fríhandil millum Grønland og Ísland var á skránni, nú íslendski forsætisráðharrin, Katrin Jakobsdóttir, hevur verið í Grønlandi.

Sermitsiaq/ag skrivar frá tíðindafundinum hjá Múte B. Egede, landsstýrisformanni, og Katrini Jakobsdóttur í gjár, at handilin millum Grønland og Ísland er vaksin 67 prosent seinastu fimm árini.

Ein fríhandilsavtala skal gerast, eru tey bæði samd um. Á tann hátt slepst undan tolli og avgjøldum.

Samstarv um ferðavinnu og javnstøðu

Samstarv um ferðavinnu, javnstøðu, burðardygd, gransking, undirvísing og veðurlagið var eisini umrøtt.

Sambært Global Gender Gap Index 2021 er størsta javnstøðan í heiminum í Íslandi.

Hetta er fyrstu ferð síðani 1998, at ein íslendskur forsætisráðharri er í Grønlandi.