- Tíðindi, mentan og ítróttur
Drap 19 børn í skúla í Texas
Drap 19 børn í skúla í Texas
Bara í ár hava verið 27 skottilburðir á amerikanskum skúlum, ella meira enn ein um vikuna
Skelkurin var stórur eftir skottilburðin í Texas í gjár. 19 børn og trý vaksin lótu lív.
Mynd: Ritzau Scanpix
25.05.2022 - 09:07
So hendi tað aftur.
Ein ungur maður skeyt frá hond í einum fólkaskúla í Texas í USA gjár.
Í minsta lagi 19 børn og trý vaksin hava latið lív. Børnini gingu í 2, 3 og 4. flokki, sigur millum annað CNN í morgun.
Brotsmaðurin, sum var 18 ár, er eisini deyður. Politiið skeyt hann.
Joe Biden, forseti, helt røðu eftir skottilburðin í gjár. (Mynd: Ritzau Scanpix)
Krevur strangari vápnalóg
Sorgarleikurin hevur longu fingið amerikanska forsetan, Joe Biden, at krevja strangari vápnalóg. Tað gjørdi hann í einari røðu í nátt.
- Tað sigur seg sjálvt, at tá ið ein 18 ára gamal kann fara í ein handil at keypa tvær hernaðarligar byrsur, er okkurt heilt galið við okkara skipan, segði Joe Biden sambært Ritzau.
39 skottilburðir í skúlum og háskúlum
Bara í ár hava 39 skottilburðir verið á fólkaskúlum, studentaskúlum og lærdum háskúlum í USA, vísir eitt yvirlit hjá CNN. Tað er meira enn ein um vikuna.
Guvernørurin í Texas, Greg Abbott, hevur annars erpað sær av fyrr í ár, at hann hevur fingið strikað so at siga allar lóggávur, sum forðaðu fyri, at fólk í Texas kunnu keypa vápn til egið brúk.
Við broyttu lóggávuni, kunnu øll yvir 21 ár, nú ganga við vápni uppi á sær í almenna rúminum, og øll, sum eru fylt 18, kunnu keypa vápn.
USA er tað landið í heiminum við flest vápnum. Mett verður, at 42 prosent av øllum heimsins vápnum eru í USA.
Er kopiera
Nýggjastu sendingar í ÚV
Nýggjastu sendingar í SV
