Vinnan saknar orðingar um lívrunnið burturkast

Vinnan saknar orðingar um lívrunnið burturkast í nýggju kunngerðini um burturkast.

Hetta er burturkast, sum dálkar sera illa, tá tað verður brent. 

Eftirspurningur er í matstovu- og gistingarhúsvinnuni eftir møguleikum at handfara lívrunnið burturkast, sum ikki dálkar umhvørvið. 

Feløgini í Vinnuhúsinum taka annars undir við uppskotinum um kunngerð um burturkast. 

Hvat er vandamikið burturkast?

Tó eru, siga tey, ymiskir ósvaraðir spurningar, sum greiða eigur at fáast á, áðrenn kunngerðin verður lýst.

Ikki verður til dømis sagt, hvat vandamikið burturkast er.

Og álagt verður virkjum og stovnum at tryggja, at burturkast úr tilfari, sum kann gagnnýtast, er fyrireikað til endurnýtslu, endurvinning ella aðra gagnnýtslu.

Gott hevði verið at fingið at vita, hvat tað merkir at vera fyrireikað til endurnýtslu, endurvinning ella aðra gagnnýtslu, heldur Vinnuhúsið.