Útseta ferð við migrantum til Rwanda

Avgerðin hjá bretska innanríkisráðnum um at flyta fólk, sum hava biðið um politiskt friðskjól í Bretlandi, til Rwanda, er útsett. 

Hetta hendir, eftir at avgerðin er kærd, váttar bretska innanríkisráðið fyri Sky News.

Flogfarið var til reiðar at fara á flog í Amesbury við sjey asylumsøkjarum.

Men Evropiski mannarættindadómstólurin hevur steðgað tvingsilsflutninginum av summum av teimum sjey, sum vóru í flogfarinum.

Mótmæla flutningi av migrantum úr Bretlandi - Mynd: Ritzau Scanpix

Fólk mótmæla, at fólk, sum hava biðið um friðskjól í Bretlandi, verða flutt til Rwanda. (Mynd: Ritzau Scanpix)

Sambært bretskum miðlum er talan um tveir irakar, sum hava søkt um friðskjól.

Teir eru fluttir úr flogfarinum, samstundis sum Evropiski mannarættindadómstólurin kannar málini hjá hinum fimm í flogfarinum, skrivar ITV á Twitter.

Boris Johnson, forsætisráðharri, kunngjørdi í apríl mánaði avtaluna við afrikanska landið um at skipa móttøku fyri migrantar, sum ólógliga eru komnir til Bretlands um Ermasund í báti.