Gevst eftir nærum hálva øld

Í meir enn 40 ár hevur Hallur Ellingsgaard verið kappróðrardómari, men á jóansøku takkaði hann fyri seg.

 - Tað er við blandaðum kenslum. Hugurin hevur altíð verið góður til hetta, og eg havi havt gott fólk at arbeiða saman við, men einaferð skal mann gevast, sigur Hallur Ellingsgaard.

Dómarin heldur, at yngri kreftir skulu sleppa framat nú, men vil kortini ikki lata hurðina heilt aftur.

 - Um tey hava brúk fyri mær onkuntíð, so skal eg hjálpa til, sigur hann. 

Nógv er broytt til tað betra

Tá tú hevur verið dómari í góð 40 ár, hevur tú sjálvsagt upplivað nógvar broytingar í kappróðrinum og í sjálvari dømingini. 

 - Nú ert tað eitt stórt apparat, sum fer í gongd, tá kappróður skal vera. Tað krevur øgiliga nógv, sigur Hallur Ellingsgaard.

Hann ivast ikki í, at úrsltini eru rættari nú, enn tey vóru fyri 40 árum síðan.

 - Úrslitini eru øgiliga góð í dag. Bátarnir liggja yvir linju á startinum, og á málinum eru videoupptøkur, og dómararnir kunnu eisini fylgja við á video, meðan róð verður, so alt kann dokumenterast, sigur Hallur Ellingsgaard.