Disney+ veksur við rúkandi ferð

Stroymingartænastan hjá Disney, Disney+, hevur havt góðan byr í seinastuni.

Í juni, tá ið annar ársfjórðingur endaði, hevði stroymingartænastan 152,1 milliónir haldarar í øllum heiminum. Tað er ein vøkstur upp á 31 prosent, samanborið við sama ársfjórðing í fjør. 

Tað sæst í roknskapinum fyri ársfjórðingin hjá Walt Disney-samtakinum, sum bleiv almannakunngjørdur í gjárkvøldið.

Um somu tíð hevur kappingarneytin Netflix mist umleið eina millión haldarar. 

Netflix er kortini framvegis størsta stroymingartænastan. Netflix hevur 221 milliónir haldarar í øllum heiminum. 

Stroymingartænastan Disney+ kom til Føroya 14. juni í ár.