Børn kunnu fáa eftirnavn hjá sammóður

Hóast hugtakið sammóðir ikki var við, tá navnalógin var samtykt, kunnu børn fáa eftirnavnið hjá sammóður.

Ikki er neyðugt at broyta navnalógina, so tað ber til. Hóast lógin ikki nevnir sammóðir, men bara faðir og móðir.

Tað metir Umhvørvis- og Vinnumálaráðið.

Magnus Rasmussen, landsstýrismaður, hevur svarað Hervør Pálsdóttur, løgtingskvinnu, sum spurdi um børn hjá  sammøðrum.

Skrásett í landsfólkayvirlitinum

Børn, sum hava eftirnavnið hjá sammóður, kunnu eisini vera skrásett í landsfólkayvirlitinum, metir Umhvørvis- og Vinnumálaráðið.

Sambært fólkayvirlitslógini verða øll, sum hava persónstal, skrásett í landsfólkayvirlitinum.

Ættarsamband millum foreldur og børn verður skrásett við p-tølunum hjá faðir og móðir.

Er talan um sammóður, verður hennara p-tal brúkt.