Farmaskip verður hjá rógvarunum um tveir tímar

Eitt farmaskip er nú á veg til bjargingarbátin við teimum báðum føroyingunum, sum róðu í bátinum, Guðruni, úr USA til Føroya.

Um hálvgum seks tíðina í morgun, UTC, fekk MRCC boð frá rógvarunum, at báturin hevði fingið ein stóran sjógv, og hevði fingið so stóran skaða, at teir vóru farnir av bátinum og í gummibjargingarbátin.

Teir vóru í flótidrakt, og høvdu mat og eina neyðsendara.

Báturin var staddur í bretskum bjargingarøki, og tí setti MRCC Tórshavn seg í samband við UK JRCC, sum tekur seg av bjargingingini.

Eitt farmaskip er nærindis, og hevur sett kós móti knattstøðuni, har bjargingarbáturin er. Farmaskipið verður væntandi hjá bjargingarbátinum um einar tveir tímar. Tað er sjaskveður á leiðini, sigur MRCC Tórshavn. 

Guðrun - Mynd: Sosialurin

Báturin Guðrun, sum teir báðir føroyingarnir róðu í, fekk ein sjógv, og rógvararnir fóru av bátinum í gummibjargingarbátin. (Mynd: Sosialurin)