Kistan við drotningini komin á Buckingham Palace

Stutt fyri klokkan átta í gjárkvøldið lendi eitt flogfar við kistuni við Elizabeth drotning í London.

Kistan var flogin úr Edinburgh, har hon hevur verið síðani mánadagin.

Kistan var koyrd gjøgnum gøturnar í London, har fólk í túsundatali vóru komin saman at síggja kistuna, hóast tað regnaði illa.

Kistan var koyrd til Buckingham Palace, har Charles kongur tók ímóti saman við hinum trimum systkjunum og báðum synunum.

Í dag verður kistan koyrd til Westminster Hall.

Har verður hon standandi til mánadagin, tá jarðarferðin verður.

Meðan kistan er í Westminster Hall, kunnu fólk alt samdøgrið ganga fram við kistuni.