Ongin norðhavssild avreidd í Noregi

Eftir ein fund við vinnuna í gjár endurtekur norski fiskimálaráðharrin, Lisbeth Berg-Hansen, at Noreg fer at nokta føroyskum skipum at landa norðhavssild í Norra, fiska føroyingar meira enn tradisjonella partin, føroyingar eiga av norðhavssildini, sum ráðharrin málber seg

Norski fiskimálaráðharrin, Lisbeth Berg-Hansen, stendur við, at føroyingar sleppa ikki at avreiða norðhavssild í norskum havnum.

Mynd: Fiskebåt

Høgni Djurhuus

13.08.2013 - 12:04

Hesin tradisjonelli parturin er, sambært hinum strandarlondunum, 32.000 tons í ár. Føroyska kvotan er 105.000 tons, og longu nú eru fiskað okkurt um 40.000 tons.

Norski fiskimálaráðharrin hitti í gjár fólk í feløgunum, sum varða av norsku fiskivinnuni. Tey tóku undir við landingarforboðnum móti Føroyum.

Forboðið fær ongan týdning sum so, tí føroysk skip landa ikki sild í Noregi. Har er eingin keypari.

Síðani 2011 eru føroysk og íslendsk skip ikki sloppin at landa makrel í Norra.

Lisbeth Berg-Hansen sigur, at Norra fer eisini at hjálpa ES, um ES setir síni ætlaðu tiltøk í verk móti Føroyum.

Tá skal ikki bera til hjá Føroyum at sleppa av sín útflutning gjøgnum Norra, tá ES-havnirnar verða stongdar.