Taka gamla bakaríið niður

Bygningarnir, har gamla bakaríið hjá Frants Restorff helt til í miðbýnum í Havn, verða nú tiknir niður.

Partafelagið HVT, sum er heildararbeiðstakari, hevur sent grannunum eitt skriv, har kunnað verður um tað, ið fer at henda í næstum.

Í hesum mánaðinum verður royndargrivið undir bygningunum fyri at kanna lendið, nú ætlanin er gera parkeringskjallara har.

Seinni í ár verður hegn sett upp uttan um byggiplássið.

Taka niður í november

Og í november verður farið at taka gomlu bygningarnar niður.

Væntast kann, at hetta fer at órógva grannalagið í ávísan mun, eisini ferðsluna í økinum, stendur í skrivinum til grannarnar.

Nær stóri íbúðarbygningurin, sum skal byggjast á økinum, er liðugur, verður einki nevnt um í skrivinum frá HVT.