Veljarakanning: Moderatarnir triðstørsti flokkur

Moderatarnir, sum er nýggi flokkurin hjá fyrrverandi danska forsætisráðharranum, Lars Løkke Rasmussen, hevði verið triðstørstur, um fólkatingsval var í dag.

Tað vísir nýggjasta veljarakanningin hjá Voxmeter, sum er gjørd fyri Ritzau. 

Moderatarnir høvdu fingið 9,2 prosent av atkvøðunum, sum svara til 17 tingfólk. 

Sosialdemokratarnir høvdu verið størsti flokkur á valinum við 25 prosentum. Tað hevði givið 46 tingsessir.

Størsti borgarligi flokkurin í kanningini er Vinstri, sum fær 14,7 prosent, ella 27 tingfólk.

Morten Messerschmidt

Morten Messerschmidt, formaður í Danska fólkaflokkinum.

Danski fólkaflokkurin missir umboðanina

Verri gongur hjá tveimum av hinum flokkunum á bláa veingi. Afturgongdin hjá teimum Konservativu í veljarakanningunum heldur fram. Flokkurin fær 7,7 prosent av atkvøðunum og 14 tingsessir í nýggju kanningini.

Uppaftur verri gongur hjá Danska fólkaflokkinum, sum bara fær 1,8 prosent at atkvøðunum. Flokkurin røkkur tí ikki upp um tinggáttina.

Tilsamans fær reyði vongur 87 tingfólk, og flokkarnir á bláa veingi fáa 71 sessir. Neyðugt er við 90 tingfólkum fyri at fáa meiriluta í fólkatinginum.