Jóanna heldur fram sum forkvinna í Fiskivinnuráðnum

Landsstýrismaðurin í fiskivinnumálum hevur tilnevnt umboð og varaumboð at manna Fiskivinnuráðið næstu fýra árini.

Fiskivinnuráðið er mannað við umboðum úr fiskivinnuni á sjógvi og landi og skal sambært lóg hava øll týðandi fiskivinnumál og øll uppskot til lógir og kunngerðir fyri fiskivinnuna til ummælis.

Í nýggja Fiskivinnuráðnum sita: Jóhannus M. Olsen og Jógvan Hansen úr Føroya Ráfiskaseljarafelag, Stefan í Skorini úr Føroya Reiðarafelag, Annfinnur Garðalíð fyri Føroya Skipara- og Navigatørfelag og Maskinmeistarafelagið, Jan Højgaard úr Føroya Fiskimannafelag, Finnbjørn Vang úr Meginfelag Útróðrarmanna og Sonja Jógvansdóttir, sum umboðar feløgini hjá arbeiðsfólki á fiskavirkjunum.

Jóanna Djurhuus, løgfrøðingur í Umhvørvis- og vinnumálaráðnum, er afturvald sum forkvinna í Fiskivinnuráðnum næstu fýra árini. Hon hevur verið forkvinna síðani 2013.