Eggja føroyskum ungdómi at gerast íverksetarar

Granskingardepilin fyri samfelagsmenning hevur í hesum døgum verið úti á miðnámsskúlum og hildið fyrilestrar, um hvussu ung kunnu gera síni hugskot til veruleika, og í dag lansera tey eina heimasíðu, sum skal geva íblástur og hjálpa spírandi ungum íverksetarum at koma í gongd. Átøkini eru partur av eini størri verkætlan, sum skal gera tað lættari og hugaligari hjá ungum at gerast íverksetarar.

Talan er um eina altjóða verkætlan, sum ber heitið RYE (Rural Youth Entrepreneurship), og londini, sum eru við, eru Føroyar, Norðurírland, Grønland og Finnland.

- Búskapurin í smáum samfeløgum hevur stórt gagn av smáum lokalum virkjum. Av tí at nógv av tí siðbundnu vinnuni hvørvur til frama fyri meira vitanarkrevjandi vinnur, rakar hetta serstakliga øki í útjaðaranum. Fyri at steðga afturgongdini í búskapi og búseting er neyðugt at fáa nýtt virksemi ístaðin fyri tað, sum fer, og her er tað, at ungdómurin og hugskot teirra eru avgerandi, skrivar Olga Biskopstø, verkætlanarleiðari í Føroyum um verkætlanina.

Almenn móttøka verður í Østrøm í dag kl. 14-16, har kunnað verður um verkætlanina og nýggju heimasíðuna.