Høgni Hoydal: Løgmaður ábyrgd av at landsstýrisfólk fyrisita lógliga

- Máti skal vera við, hvørjum Kaj Leo Holm Johannesen, løgmaður, skal sleppa avstað við. Løgmaður hevur rættarliga ábyrgd av at hava eftirlit við, at landsstýrismenn fyrisita lógliga. Tað er hansara fremsta uppgáva. Og løgmaður hevur virkið afturvíst at steðga framferðini hjá Kára P: Højgaard, landsstýrismanni.

Tað sigur Høgni Hoydal, formaður í Tjóðveldi, eftir at løgmaður fyrrapartin segði í ùtvarpinum, at hann sigur seg einki kenna til atfinningarsomu viðmerkingarnar móti lógaruppskotinum um Eysturoyartunnilin.

Løgmaður vardi alment

Høgni Hoydal sigur, at longu tá hann og Aksel V. Johannesen settu fyrispurning um málið um miðjan juni, helt landsstýrismaðurin upplýsingum frá Landsverki aftur. Hetta vardi løgmaður alment.

- Undir 1. viðgerð av lógaruppskotinum varð spurt óteljandi ferðir frá tingfólki beinleiðis til løgmann, um allar upplýsingar ikki áttu at koma fram. Hann vísti øllum frá sær, sigur Høgni Hoydal.

Hevur einki gjørt

- Fyri fleiri vikum síðani hava framstandandi løgfrøðingar sum Halgir W. Poulsen sagt alment í Kringvarpinum, at tað er ólógligt at senda eitt lógaruppskot niðan uttan allar upplýsingar. Løgmaður hevur onki sagt ella gjørt, sigur formaðurin í Tjóðveldi.