Kongurin vil hava sonin at arva trónuna

Carl Gustav kongur í Svøríki heldur ikki, at dóttirin, Victoria krúnprinsessa, eigur at arva trónuna. Í staðin eigur yngri beiggin, Carl Philip prinsur, at verða næsti kongur í Svøríki, heldur hann.

Tað sigur Carl Gustav kongur í samrøðu við svenska sjónvarpið, SVT. 

Tað var í 1980, at svenska grundlógin var broytt, soleiðis at elsta barnið hjá kongshjúninum, í hesum førinum Victoria krúnprinsessa  kundi arva trónuna. 

Fyri grundlógarbroytingina var tað annars yngri beiggi hennara, Carl Philip, sum stóð fremstur í arvarøðini. Tað gjørdi hann í umleið hálvt ár - frá tí at hann var føddur, til lógin var broytt. Eftir broytingina fekk tann tá trý ára gamla Victoria krúnprinsessa heitið trúnarvingur.

Carl Philip prinsur, Svøríki

Carl Philip prinsur misti heitið sum trúnarvingur, tá svenska grundlógin var broytt í 1980.

Sonurin føddur trúnarvingur

Tað var skeivt, at heitið trúnarvingur var tikið frá Carl Philip prinsi, helt Carl Gustav kongur tá, og tað heldur hann enn. 

- Carl Philip var føddur krúnprinsur, og eg haldi framvegis, at lógin átti ikki at verið broytt við afturvirkandi gildi, sigur svenski kongurin í SVT-dokumentarinum Síðstu kongarnir í Svøríki. 

Hann vísir á, at sonurin var føddur trúnarvingur, og síðan var lógin brádliga broytt, og tað heldur svenski kongurin vera løgið.

Tað er ikki nýtt, at svenski kongurin er av hesi áskoðan, tí longu tá ið svenska grundlógin bleiv broytt fyri meira enn 40 árum síðan, gjørdi Carl Gustav kongur vart við, at hann tók ikki undir við broytingini.

Tá ið Victoria krúnprinsessa fekk heitið trúnarvingur í 1980, segði Carl Gustav kongur, at starvið er ov strævið fyri eina gentu. 

Carl Gustav kongur bleiv sjálvur kongur, hóast hann er yngstur av fimm systkjum. Hann hevur fýra systrar, sum allar eru eldri enn hann. 

Victoria prinsessa

Victoria prinsessa arvar trónuna í Svøríki.