Landsliðsliðskipari til HB

Liðskiparin á føroyska fótbóltslandsliðnum, Viljormur Davidsen, skal spæla við HB.

In.fo skrivaði um hálvan desember, at landsliðsbakkurin fór at skriva undir sáttmála við stórfelagið í Havn, og nú er skiftið alment.

 - Eg havi havt okkurt (tilboð, red.) uttanlands og okkurt í Føroyum eisini, men nú velji eg at koma heim, sigur Viljormur Davidsen við Kringvarpið. 

Viljormur Davidsen hevur spælt uttanlands í 15 ár, seinast í svenska felagnum, Helsingborgs, har hann var liðskipari, og bakkurin er ikki komin heim fyri at hugna sær.

 - Vit skulu vinna so nógvar dystir sum gjørligt og fara eftir at vinna FM og vera tað besta liðið í landinum. Eg vil fegin koma heim at vinna okkurt og spæla væl, so eg kann halda fram á landsliðnum, sigur Viljormur Davidsen.