- Tíðindi, mentan og ítróttur
Sí myndirnar: Fyrsti landsstýrisfundur
Sí myndirnar: Fyrsti landsstýrisfundur
Kaffi, tvey mál og útlutan av serligum parkeringsloyvum til landsstýrisfólkini vóru eitt nú á skránni, tá nýggja landsstýrið hevði sín fyrsta fund
10.01.2023 - 14:55
Nýggju landsstýrisfólkini, sum skulu stjórna Føroyum næstu fýra árini, høvdu sín fyrsta fund úti í Tinganesi í morgun.
Myndir: © Bjarni Árting Rubeksen
Høgni Hoydal, landsstýrismaður í uttanríkis- og vinnumálum, Bjarni Kárason Petersen, landsstýrismaður í lógar- og innlendismálum, og Sirið Stenberg, landsstýriskvinna í almanna- og mentamálum, fáa sær eitt sindur av frískari luft á gáttini til ovasta stýrisvaldið í landinum.
Ruth Vang, landsstýriskvinna í fíggjarmálum, tykist hava tørv á einum kaffimunni oman á morgunmatin, áðrenn hon sessast við fundarborðið úti í Tinganesi.
Ein væl nøgdur og væl settur Dennis Holm, landsstýrismaður í fiskivinnumálum, setir taskuna frá sær, meðan Pól Rosenmeyer Wolles, deildarstjóri á ritara- og stjórnartænastuni í Tinganesi, borðreiðir við frískari frukt.
Aksel V. Johannesen, løgmaður, er eftir øllum at døma ikki vorðin troyttur av at drekka kaffi oman á tær longu samgongusamráðingarnar beint eftir valið.
Bjarni Kárason Petersen er yngsti landsstýrismaður higartil, sum tekur sæti við fundarborðið til landsstýrisfund í Tinganesi.
John Rajani, løgmansstjóri, stjórnar Tinganesi við einum beini í tí gamla við einum vanligum blokki og einum beini í nútíðini við einari Microsoft Surface-teldu.
Ingilín Strøm, landsstýriskvinna í orku- og umhvørvismálum, sessast við borðið undir liðini á Bjarna Kárasyni Petersen.
Tey bæði skulu eisini sita undir liðini á hvørjum øðrum í gamla Sjóvinnubanka-bygninginum í Gongini, har aðalráðini hjá teimum fara at húsast.
Fyrsta punktið á skránni á fyrsta landsstýrisfundinum hetta valskeiðið var útlutan av serligu parkeringsloyvunum til landsstýrisfólkini úti í Tinganesi.
Sirið Stenberg, landsstýriskvinna, við serliga parkeringsloyvinum og eyðkenda blokkinum, ið hon altíð hevur við sær.
Almanna- og mentamálaráðið hjá Sirið Stenberg, landsstýriskvinnu, skal húsast úti á Eirargarði.
Eirargarður verður eisini adressan hjá Heilsumálaráðnum og Margit Stórá, landsstýriskvinnu.
Djóni Nolsøe Joensen, landsstýrismaður í barna- og skúlamálum, skal fyribils húsast í hølunum hjá Havnar arbeiðarafelag við Tinghúsvegin fram til august mána.
Ætlanin er tó, at løgtingsfólk skulu hava skrivstovur í bygninginum, og tí verður leitað eftir hølum til Barna- og skúlamálaráðið.
Ingilín Didriksen Strøm, landsstýriskvinna í orku- og umhvørvismálum, hevur tikið sæti til fyrsta landsstýrisfundin hetta valskeiðið.
Dennis Holm, landsstýrismaður í fiskivinnumálum, hevur gjørt eina skjóta framflyting inn í landspolitikk. Hann var nývaldur til løgtingsvalið 8. desember, og situr longu nú til háborðs í Tinganesi við sínum nýggja, serliga parkeringsloyvi.
Ætlanin hjá landsstýrinum er, at Ruth Vang, landsstýriskvinna í fíggjarmálum, skal hava eitt uppskot um fíggjarlóg fyri 2023 klárt at leggja fyri løgtingið 14.februar.
Nýggja landsstýrið ætlar eisini at yvirtaka farsóttarmálsøkið, og uppskotið, sum var fyri á landsstýrisfundinum í dag, verður neyvt tað sama, ið undanfarna landsstýri kom við í løgtingið, sigur Aksel V. Johannesen, løgmaður.
|
|
Er kopiera
