Bústaðir: Íbúðir í Sandavági bodnar til leigu

Fimm íbúðir, sum Bústaðir hava bygt á Steigarbrekku í Sandavági, eru lidnar, og eru bodnar til leigu eftir bíðilistanum hjá Bústøðum. 

Jákup á Stongum, arkitektur, hevur teknað íbúðirnar, og Seve og Norðhús hava bygt fyri Bústaðir. 

Verkætlanin er ment í samstarvi við Vága kommunu.

Íbúðirnar eru 81 fermetrar til støddar, og samanbygdar í einari lon í einari hædd. 

Hitaðar við jarðhita

 Útsýni er oman yvir bygdina. Til hvørja íbúð eru úthús og terassa. 

Íbúðirnar verða hitaðar við jarðhita. Góð parkeringsviðurskifti eru framman fyri íbúðirnar.

Húsaleigan er 8.400 um mánaðin, og fyrstu leigararnir flyta inn 1. mars. Í Vágum hava Bústaðir frammanundan 10 íbúðir í Sørvági. 

Við hesum nýggju íbúðunum í Sandavági hava Bústaðir tilsamans 422 búeindir.