Kommunur bjóða skeið í familjumenning

Alsamt fleiri kommunur hava síðstu tíðina gjørt avtalu um samstarv við MEA, sum er húsið fyri familjumenning.

Síðstu kommunurnar eru tær í Vágum - Sørvágs kommuna nú um dagarnar og Vága kommuna í desember.

Samstarvsavtalan gevur foreldrum og børnum teirra amboð og hjálp til at styrkja um familjulívið.

Avtalurnar, sum verða gjørdar við kommunurnar, eru eitt víðkað tilboð til borgararnar og eru eisini fevndar av avtaluni millum Almannamálaráðið og MEA.

Øll pør, sum gerast foreldur fyri fyrstu ferð, fáa ókeypis parskeið, og eisini fáa foreldur, sum eru farin hvør til sítt, foreldraskeið.  

Vígdis Skorheim, leiðari fyri MEA, sigur, at MEA vil styrkja tann einstaka, familjuna, parlagið og foreldrasamarbeiðið eftir møguligan skilnað.

MEA bjóðar eitt víðkað skeiðstilboð, so foreldur millum annað kunnu fáa amboð til, hvussu tey best kunnu samstarva um børnini, tá ið talan er um hjúnaskilnað ella samlívsslit.