Akstova í Norðureysturoy: Tilboðini eru ov dýr

Tilboðini at gera høli til ætlaðu Akstovuna í Gøtudali vóru ov dýr, og tí er fyribils ikki komið víðari við ætlanini. 

Tað sigur Dennis Holm, landsstýrismaður í fiskivinnu- og samferðslumálum, í svari til fíggjarnevndina. 

Tað var Uni Rasmussen, fyrrverandi landsstýrismaður, sum ætlaði at leggja Akstovna í Klaksvík og Saltangará saman, og gera eina nýggja í Norðureysturoy. Ætlanin var, at Akstovan skuldi leiga høli at vera í.

Andras Marr Poulsen

Andras Marr Poulsen er stjóri á Akstovuni.

Trý tilboð

Trý tilboð komu inn at byggja høli, og tvey av teimum luku treytirnar. Væntað varð, at leiguprísurin fór at vera um hálva millión kr. um árið. Men tilboðini vóru væl hægri.

Samráðingar vóru við tveir av tilboðsgevarunum, sum luku treytirnar, um at gera nakrar sparingar. Tað er gjørt, men prísurin er framvegis tvífalt tað, sum væntað var, og sum Akstovan hevur pening til at fíggja, sigur Andrass Marr Poulsen, stjóri á Akstovuni.

Fleiri inntøkur

Nú verður kannað, um politisk undirtøka kann fáast, so at inntøkugrundarlagið hjá Akstovuni verður tillagað, og stovnurin fær fíggjarligt grundarlag at gera bindandi avtalu um leigugjald.

Akstovan vil eisini fáa fíggjarligan møguleika at seta fleiri fólk í starv.

Ætlanin var, at Akstovan í Norðureysturøkinum skuldi lata upp fyrst í 2024. Tað dregur tó út, nú eingin avtala er gjørd enn.