Hálv triðja millión í avlopi

Ársúrslitið hjá Suðuroyar sparikassa í fjør var 2,5 milliónir í avlopi fyri skatt. Hetta eru 100.000 krónur minni enn árið fyri.

Grundraksturin vaks úr 3,7 mió. kr. í 2021 upp í 5,8 mió. kr. í 2022, upplýsir Suðuroyar sparikassi.

Í sambandi við útlán, vuksu realkredittlánini munandi, heili 36 prosent. Í dag eru 25 prosent av øllum 1. veðrættum hjá Suðuroyar sparikassa fíggjað við realkredittum.

- Í fjør sóu vit, at kundarnir valdu realkreditt, og við ársenda hevði Suðuroyar sparikassi veitt 31 prosent av allari nýggjari realkredittfígging á føroyska marknaðinum, sigur Søren L. Bruhn, stjóri.

Solvensurin hjá sparikassanum vaks úr 22,2 prosentum upp í 22,3 prosent frá 2021 til 2022.

Lógarkravið til samlaða solvensin hjá Suðuroyar sparikassa er 20,7 prosent.