- Tíðindi, mentan og ítróttur
900 vilja sleppa á miðnámsskúla
![](https://kvf.fo/sites/default/files/styles/grein-ovasta-mynd/public/glasirtimburdeildin_tjald-12.jpg?itok=JvARqPKJ)
Tá freistin at søkja inn á miðnámsútbúgvingar var úti á midnátt, vóru 878 umsóknir komnar inn. Hetta eru 40 umsóknir færri enn í fjør, og umleið 100 færri enn í 2021, upplýsir Undirvísingarstýrið.
Av teimum 878 umsøkjarunum, hava 677 søkt inn á gymnasialu breytirnar, 18 hava søkt inn á Heilsuskúlan og 183 á yrkisrættaðu útbúgvingarnar.
Toppskjúttin gjørdist náttúrubreytin, sum fekk yvir 200 umsóknir. Hetta er á leið sama tal sum undanfarin ár.
Fleiri gentur enn dreingir
Eins og undanfarin ár, eru tað fleiri gentur enn dreingir, sum søkja inn á miðnám.
Í ár eiga genturnar 58 prosent av øllum umsóknunum. Síðani 2015 hava gentur verið betri umboðaðar á gymnasialu breytunum, uttan á búskaparbreytini og tøknibreytini, har dreingirnir eru í meiriluta.
Síðani 2015 hevur talið á umsóknum verið minkandi. Talan er um 342 umsóknir færri enn í 2015.
Farið verður nú undir at viðgera umsóknirnar, og umsøkjararnir fáa svar í seinasta lagi 21. apríl, sigur Undirvísingarstýrið..