Taraalarar hittust í SALT

Fyrr í vikuni var verkstova um taraaling í SALT á Tvøroyri, har viðgjørt og umrøtt varð, hvussu taraaling í Føroyum skal skipast, herundir hvussu myndugleikaviðgerðin virkar og hvørjir manglar eru.

Tað heilt serliga við verkstovuni var, at ymiskir aktørar vóru savnaðir at umrøða og viðgera møgulig árin av taraaling, fyri at kunna eyðmerkja avbjóðingar, áðrenn hesar verða ein trupulleiki.

Tað eru tvey tara-alifeløg í Føroyum, Ocean Rainforrest og TARI, og bæði feløg høvdu framløgur og vóru væl umboðað.

Eisini vóru framløgur frá Umhvørvimálaráðnum, Heilsufrøðiligu starvsstovuni, Fiskaaling og norska granskingarstovninum NIVA.

Eftir framløgurnar var eitt orðaskifti, har møguleikar og avbjóðingar í tara-alivinnuni vóru umrøddir.

Tað er Fiskaaling, sum er verkætlanarleiðari, og verkætlanin er fíggjað av Norðurlendska Ráðharraráðnum, Aarhus Universiteti og Fiskaaling.