- Tíðindi, mentan og ítróttur
HEARTIST-filmsframleiðarar: "Vit mugu tora at hugsa stórt"
![](https://kvf.fo/sites/default/files/styles/grein-ovasta-mynd/public/heartist_framleidarar.jpg?itok=51p6gGo-)
Sunnudagin 19. mars bleiv stórfingni føroyski heimildarfilmurin "HEARTIST", sum snýr seg um listakvinnnuna Sigruna Gunnarsdóttir, frumsýndur á altjóða filmsfestivalinum CPH:DOX í Keypmannahavn.
Filmurin er eisini í uppskoti saman við 13 øðrum um at vinna heiðurin fyri besta norðurlendska dokumentarfilm.
Verkætlanin at gera ein heimildarfilm um Sigruna Gunnarsdóttir byrjaði fyri fimm árum síðani og hevur kostað 3,2 milliónir krónur.
Leikstjórarnir Marianna Mørkøre og Beinta á Torkilsheyggi skuldu, saman við filmsfotografinum Rógva Per Rasmussen, gera ein film upp á fimm minuttir til Listaskálan.
Men skjótt gjørdist greitt, at Sigrun Gunnarsdóttir var so mikið áhugaverd, at tey vildu gera ein dokumentarfilm (heimildarfilm) um hana.
Kann røkka langt út í verð
Birgir Kruse hevur ummælt filmin á sínum bloggi, og hann skrivar um filmin:
"HEARTIST er tann føroyski filmur, sum í filmiskum frásøgukynstri kann røkka longst út í verð. Tað estetiska gongur aftur í filminum, og einki er gjørt av tilvild."
Leikstjórarnir og framleiðarnir hava eisini hugsað um hvønn smálut í filminum.
Tá upptøkurnar til filmin byrjaðu, var ætlanin at gera ein siðbundnan dokumentarfilm, men tá umleið eitt ár var farið, hálsaðu framleiðarnir um.
Filmurin endaði við at gerast eitt portrett av bæði listakvinnuni og hennara list, um mann kann siga tað soleiðis. Ein listadokumentarfilmur.
Fyri at gera listina hjá Sigrun meira livandi, so hava tey biðið Katy Beveridge úr London um at gera listina hjá Sigrun um til teknifilm.
Stuðul ger allan munin
Stigtakarnir til filmin hava fingið stuðul úr Filmsgrunninum, men størsti parturin, 2,8 milliónir krónur, eru komnar úr filmsgrunninum Norddok, ið bleiv settur á stovn í 2019.
Endamálið við Norddok er at veita stuðul til filmar, ið á ein ella annan hátt lýsa viðurskftir í ríkisfelagsskapinum.
Ein brellbiti av "HEARTIST" sæst niðanfyri.
Heartist from kykmyndir on Vimeo.