Sáttmálarnir hjá pedagogunum fevna um 1.770 ársverk

Tann 1. apríl fer sáttmálin hjá Pedagogfelagnum úr gildi, og felagið sigur seg vera til reiðar at fara til samráðingarborðið. 

Føroya Pedagogfelag hevur sáttmálar við Kommunala arbeiðsgevarafelagið, sum í stórum mun fevnir um leiðarar, námsfrøðingar, námsfrøðishjálparar og hjálparfólk á vøggustovum, barnagørðum, frítíðarskúlum og forskúlum. 

Eisini hevur Pedagogfelagið sáttmálar við landið, sum er fyri stovnar undir Almannaverkinum, ið veita tænastur eftir logini um almannatrygd og tænastur. 

Onnur størv eru eitt nú námsfrøðiligir stuðlar í fólkaskúlanum og ymisk onnur størv. Her er eisini talan um leiðarar, námsfrøðingar og hjálparfólk.

1.770 ársverk

Seinastu hagtølini frá arbeiðsgevarum vísa, at umleið 1.770 ársverk eru fevnd av sáttmálum hjá Pedagogfelagnum. 

Býtið millum námsfrøðingar og hjálparfólk er ymiskt hjá landi og kommunum. 

Hjá landinum eru umleið 500 ársverk, harav 140 eru hjálparfólk ella námsfrøðishjálparar, svarandi til 28 prosent

Hjá kommununum er støðan øðrvísi, har eru umleið 1.270 ársverk. Umleið 760 ársverk eru hjálparfólk ella námsfrøðishjálparar, svarandi til sløk 60 prosent, sigur Pedagogfelagið.