60 vilja vera við í lutakasti um fýra grundstykki

Okkurt um 60 fólk hava søkt um at vera við í lutakastinum um fýra grundstykki við Klingurstjørn á Argjum.

Hetta eru stykki, sum eru latin inn aftur til Tórshavnar kommunu.

Talan er um eitt grundstykki í útstykkingini Klingurstjørn 1. Hini trý eru í útstykkingini Klingurstjørn 2. 

Kanna umsóknirnar

Umsóknirnar verða nú kannaðar. Tær skulu lúka treytirnar fyri at vera við í lutakastinum.

Har til dømis bæði maður og kona hava søkt, er ikki talan um tvær umsóknir, men bara um eina.

Og fólk, sum longu eiga bústað, sleppa ikki við.

Tveir advokatar vera hjástaddir, tá telda kastar lut millum teirra, sum eftir eru í lutakastinum.