MEGD: Rættindi hjá børnum og ungum verða ikki vird

Rættindini hjá fleiri børnum og ungum, ið bera brek í Føroyum, verða ikki vird.

Tað sigur MEGD í yvirlýsing, sum var send út í gjárkvøldið.

Brekrættindasáttmálin staðfestir, at umstøður og karmar eiga at verða tillagað, so at øll børn og ung, ið bera brek, fáa somu virðing, sum onnur børn.

Men hetta er ikki so, sigur MEGD í yvirlýsingini. Harumframt er vantandi samstarv millum myndugleikar og viðkomandi partar, so at tænastur eru misjavnar  alt eftir, hvar í landinum ein býr.

MEGD heitir á viðkomandi myndugleikar skjótast gjørligt at fáa burtur allan mismun vegna brek, styrkja lógarverkið og sameina tænastur.

Yvirlýsingin er undirskrivað av teimum 24 limafeløgunum í MEGD.