Atlantsflog hevur nú aftur avlop

Avlopið hjá Atlantic Airways í fjør var 21 milliónir krónur.

Tað boðar flogfelagið frá í tíðindaskrvi í dag.

Stórur vøkstur í ferðafólkatalinum og økt leiguflúgving hava bøtt munandi um raksturin, ið nú aftur gevur avlop.

Avlopið eftir skatt var 21 milliónir krónur í 2022 samanborið við 10 milliónir krónur í halli árið fyri, sigur Atlantic.

Ársroknskapurin var lagdur fram á árs aðalfundinum, sum hevur verið í dag.

Ferðafólkatalið setir met

351.000 ferðandi flugu á rutunetinum hjá Atlantic Airways í 2022. Hetta er met.

Samanborið við 2021 er ferðafólkatalið vaksið 150.000 ferðafólk. Umleið 47 prosent vóru útlendsk ferðafólk, ið svarar til umleið 164.000 ferðaseðlar.

Tá ið føroyingar uttanlands verða taldir við, vísa hagtølini, at umleið 55 prosent av ferðafólkunum eru búsitandi uttanlands.

Niels Mortensen

Niels Mortensen heldur fram sum nevndarformaður í Atlantsflogi

Nevndin afturvald

Øll nevndin var afturvald á aðalfundinum.

Niels Mortensen heldur fram sum nevndarformaður og Kaj Johannesen sum næstformaður. Hini í nevndini eru Esther Dahl, Annika Larsen Black, Jens Eystein í Løðu og Tommy Andreasen, ið er nývaldur sum starvsfólkavaldur nevndarlimur.