Málið um píkar verður tikið upp

Síðani 1976 og í eini 45 var loyvd at koyra við píkadekkum frá 16. oktober til 30. apríl, men í 2021 varð tíðarskeiðið víðkað við tveimum vikum upp í sjey mánaðir, frá 16. oktober til 14. mai.

– Samanborið við grannalondini, ið hava nógv strangari vetrarveður og fleiri hálkudagar, kann tað tykjast sum ein andsøgn, at koyring við píkadekkum er loyvd sjey mánaðir um árið í Føroyum.

Tað heldur Andreas Mouritsen, flogskipari, sum í 25 ár hevur koyrt til arbeiðis millum Hoyvík og flogvøllin, og eisini landsstýrismaðurin í ferðslumálum, Dennis Holm, undrast á, at Føroyar loyva koyring við píkadekkum í sjey mánaðir um árið.

Tá ið koyrt verður við píkadekkum, uttan at tað er hált, gevur tað óneyðugt slit av asfaltinum, ið so aftur ber stóran kostnað við sær.

Norsku vegamyndugleikarnar vísa á, at koyrir tú 20 kilometrar við píkadekkum, gevur tað 200 gram av asfaltstøvi – ella so nógv sum 20 kilo eftir einum vetri.

Dennis Holm sigur, at hann hevur sett sær fyri at taka málið upp, og orsøkirnar til tað eru júst slit og umhvørvisdálking.

LES EISINI: Føroyar eiga metið í píkakoyring