Fleiri enn 24 næmingar í 20 flokkum

Í 20 fólkaskúlaflokkum vóru fleiri enn 24 næmingar 1.februar í ár.

Landsstýrismaðurin fer saman við fyrisitingini og skúlunum at kanna hetta, so væl verður lýst, hví næmingartalið fer upp um 24, og góðar loysnir funnar. 

Tað sigur Djóni Nolsøe Joensen, landsstýrismaður, í svari til Magnus  Rasmussen, løgtingsmann, sum spurdi, við hvørjari grundgeving landsstýrismaðurin hevur góðtikið, at næmingatalið fer upp um 24 næmingar í einum flokki.

Hann sigur, at orðingin í fólkaskúlalógini, sum sigur, at við skúlaársbyrjan eigur næmingatalið vanliga ikki at fara upp um 24 í hvørjum flokki, hevur fyrisitingarliga ikki verið umsitin soleiðis, at landsstýrisfólkið í hvørjum einstøkum føri og á hvørjum ári hevur góðtikið, at næmingatalið tíðum hevur verið størri enn 24. 

Verður hugt nøkur ár aftur, hava verið yvir 24 næmingar við skúlaársbyrjan í stívliga 20 flokkum.

Landsstýrismaðurin nevnir møguleikan, sum skúlar hava at býta flokkar sundur.

Hann sigur, at nú verður kannað, hvat skal gerast, so talið 24 kann haldast.