Miðlar á vegamóti: Frágreiðing um ráðstevnuna

Tað hevur leingi staðið øllum greitt, at føroysku miðlarnir standa á einum vegamóti. Minkandi inntøkur og vaksandi útreiðslur hótta fíggjarliga grundarlagið undir privata blaðmarknaðinum og almenna public service-miðilinum. Samstundis eru bæði staðbundnir miðlar og tjóðarmiðlar undir vaksandi trýsti í alheimsgjørda miðlalandslagnum.

Á ráðstevnuni kom m.a. fram, at:
— Yvir 100 størv eru horvin úr Dimmalætting, Sosialinum
og Kringvarpinum tey seinastu 15 árini

— Altjóða rákið, har fólk vraka tíðindasendingar, tekur dik á seg
— Álitið á public service-miðlum er framvegis stórt
— Privatir miðlar í Føroyum hava munandi minni pengar at arbeiða við pr. íbúgva samanborið við privatar miðlar í størru Norðurlondunum
— Stór ónøgd er við føroysku miðlastuðulsskipanina
— Føroysku lýsingapengarnir fara av landinum
— Broyttu miðlavanarnir hótta savningarmegina í føroyska samfelagnum

Tað finst onki quick fix, sum kann loysa avbjóðingarnar í miðlalandslagnum. Í staðin er tørvur á nýhugsan yvir ein breiðan kamb. Men nýhugsan fremist best innan tryggar karmar; tí mugu vit fáa eina breiða fjølmiðlasemju, sum røkkur tvørtur um valskeið.

Hesi viðurskifti hava stóra ávirkan á okkara fólkaræði og mentan. Ein breið semja má tí byggja á ta sannroynd, at miðlapolitikkurin er partur av mentanarpolitikkinum. Miðlarnir eru almannagagnligir ágóðar og kunnu tí ikki rekast eftir marknaðartreytum aleina. Ynskja vit eitt sterkt miðlalandslag, so mugu atlit takast bæði at fíggjarliga grundarlagnum og fyritreytunum fyri menning innan journalistikk og tøkni.

Miðlarnir mugu eisini í størri mun líta inneftir. Átrokandi arbeiðið at røkka ymsu føroysku málbólkunum í talgilda tilboðsmeldrinum setur nýggj krøv til miðlaleiðslurnar. Her mugu vit tó ongantíð gloyma, at kravið um dygdargóðan og viðkomandi journalistikk eigur at vera í miðdeplinum. Á ráðstevnuni kom fram, at álitið á føroyskum miðlum framvegis er lutfalsliga høgt. Tað má ikki fara fyri skeytið.

Ivan Hentze Niclasen

Hesi løgdu fram á ráðstevnuni

— Mark Blach-Ørsten, professari, RUC
— Mads Brandstrup, stjóri, Danske Medier
— Valgerður Anna Jóhannsdóttir, assistant professor, Háskóli Íslands
— Eirikur Lindenskov, stjóri, Sosialurin
— Jóhann Lutzen, stjóri, Norðlýsið
— Ivan Hentze Niclasen, stjóri, Kringvarp Føroya
— Lars Nord, professari, MittUniversitetet
— Signe Ravn-Højgaard, adjunktur, Grønlands Universitet
— Keld Reinicke, miðlaráðgevi og fyrrv. programmleiðari á Tv2
— Heini í Skorini, lektari, Fróðskaparsetur Føroya
— Sveinur Tróndarsson, blaðstjóri, Dimmalætting