Ætla at byggja útgerðarhavn á Drelnesi

Ætlan er nú løgd til fyrireikingarnar til eina útgerðarhavn á Drelnesi. Tað skrivar Suðuroyarportalurin. Seinnapartin í gjár var fundur millum Tvøroyrar býráð og partafelagið Nordserv Drelnes um eina møguliga útgerðarhavn á Drelnesi.

Stovnaðu felag í nítiárunum

Nordserv Drelnes er eitt felag, sum Danbor í Esbjerg og partafelagið Richard B. Thomsen á Tvøroyri stovnaðu í hálvfemsunum. Og Danbor í Esbjerg er partur av AP Møller/Mærsk-samtakinum. Við á fundinum í gjár við Tvøroyrar býráð var menningarstjórin hjá Danbor í Esbjerg, Steen Hansen.

Hann sigur í samrøðu við Suðuroyarportalin, at partarnir løgdu eina ætlan fyri, hvussu arbeiðast skuldi við ætlanunum at gera eina útgerðarhavn á Drelnesi.

- Vit fara nú at tosa við áhugað oljufeløg, og bjóða okkum fram at veita teimum eina sera góða tænastu á Drelnesi, sigur Steen Hansen við Suðuroyarportalin. Hann sigur eisini, at Tvøroyrar kommuna kunnaði teir um økið á Drelnesi.

Útgerðarhavn og mentanarhús

Tvøroyrar kommuna boðaði Norserv Drelnes frá, at tað heilt skjótt verður farið undir at byggja eitt mentanarhús á økinum, og at økið til útgerðarhavnina tí ikki verður so stórt, sum av fyrstan tíð ætlað. Men partafelagið Nordserv Drelnes boðaði frá, at økið er nóg størt til bæði útgerðarhavn og mentanarhús.