Kryptofrímerki á marknaðin

Hesa vikuna kemur Posta á marknaðin við einum sonevndum kryptofrímerki.

Talan er um eitt frímerki, sum kann brúkast sum postgjald, men sum eisini hevur eina sonevnda QR-kodu á, sum ger, at frímerkið kann virkjast og goymast á netinum og kanska seinni seljast víðari við møguligum vinningi - um tað er so serligt, at næstan eingin annar hevur tað.

Tey fýra frímerkini, sum Heiðrikur av Heygum hevur teknað, ímynda hvør sína árstíð og hava eitt virði upp á 100 krónur, og eru tískil ikki ætlað vanligum kundum, sum ætla sær at senda eitt bræv. Talan er um frimerkjasamlarar, NFT-samlarar og onnur, sum hava áhuga fyri talgildari list.

Ingun Nolsøe Olsen er leiðari á Frímerkjadeildini.