Hevur fingið tilmæli um avloysaraskip fyri Smyril

Í næstu viku verður greitt, hvør fer at røkja suðuroyarsiglingina fyri Smyril, tá hann skal hava nýggjar hjálpimotorar.

Dennis Holm, landsstýrismaður, sigur, at Strandfaraskip Landsins hava kannað ymsar møguleikar, og hava nú sent honum tilmæli.

Endalig støða er ikki tikin til, hvussu hetta verður loyst, sigur Dennis Holm, tí hann ætlar at umrøða spurningin við landsstýrið, áðrenn hann tekur endaliga støðu.

Smyril hevur fýra hjálpimotorar, og av teimum skulu tveir skiftast.

Í tí sambandi skal annað skip finnast at sigla fyri Smyril, meðan arbeiðið verður gjørt.

Dennis Holm

Dennis Holm, landsstýrismaður í samferðslumálum.

Motorar úr Kina

Dennis Holm sigur, at motorarnir eru umbidnir og goldnir, og koma til Føroya úr Kina í august.

Smyril fer ikki av landinum, tí arbeiðið verður gjørt í Føroyum.

Nær hetta verður, og hvussu leingi, tað fer at taka, er ikki greitt enn.

Av tí at málið lutvíst snýr seg um pengar, og at eykajáttan tí skal til, fer Dennis Holm at umrøða hetta á landsstýrisfundi týsdagin.

Málið verður væntandi avgreitt í næstu viku.