Partarnir hitta Semingsstovnin seinnapartin

Kommunulæknafelagið og Fíggjarmálaráðið hitta Semingsstovnin seinnapartin at umrøða semingsuppskotið, sum partarnir hava fingið.

Hvørki Marjus Dam, formaður í Kommunulæknafelagnum, ella Jan Mortensen, stjóri á Lønardeildini, vilja siga nakað um, hvat teir - hvør í sínum lagi - ætla at bera fram á fundinum við Semingsstovnin.

Eftir hvat skilst, er framvegis samband millum partarnar.

Terje Sigurðsson, semingsmaður, sigur í stuttari viðmerking, at fundurin, sum skuldi vera á middegi, er útsettur til seint seinnapartin.

Semingsstovnurin hevur lagt uppskot fyri partarnar í málinum um læknavaktina 1870.

Terje Sigurðsson

Terje Sigurðsson, semingsmaður, hittir umboð fyri Kommunulæknafelagið og Lønardeildina seint seinnapartin.

Kommunulæknafelagið og Fíggjarmálaráðið skulu taka støðu til uppskotið, og høvdu fingið freist at svara semingsstovninum á middegi. 

Kommunulæknarnir boðaðu 31. mai frá, at læknavaktin á telefon 1870 í Landssjúkrahúsinum helt uppat dagin eftir, 1.juni.

Kommunulæknarnir skuldu sjálvir kunngera, hvør hevur vakt og nær.

Sama dagin, 31.mai, boðaði Heilsutrygd frá, at læknavaktin helt fram á telefon 1870, men at tað eisini bar til at brúka telefonnumrini, sum kommunulæknarnir upplýsa.

Og læknavaktin er ikki í Landssjúkrahúsinum longur. 

Læknavaktin hevur ligið í sáttmálaloysi í meira enn tvey ár, og viðurskiftini hjá læknavaktini eru óskipað, hevur Marjus Dam, formaður í Kommunulæknafelagum, sagt.