209 tikið universitetsprógv á Fróðskaparsetrinum

Norðurlandahúsið var fullsett fyrrapartin, tá stóra prógvhandanin var hjá Fróðskaparsetri Føroya.

Tilsamans hava 209 kvinnur og menn fingið universitetsprógv frá Fróðskaparsetrinum hetta seinasta árið: 153 hava staðið bachelorútbúgving, 27 masterútbúgving, 7 ph.d-útbúgving og 22 hjánám o.a.

Fróðskapartsetrið sigur, at nógv tann størsti bólkurin eru tey, sum hava staðið prógv sum námsfrøðingur. Tey eru 42 í tali. 

Eisini er bólkurin av nýggjum sjúkrarøktarfrøðingum rættiliga stórur, tey eru 34 í tali. 

23 fólkaskúlalærarar hava somuleiðis staðið prógv frá Setrinum seinasta árið, 13 bachelorar í búskapar- og virkisfrøði, 10 í KT-verkfrøði og sjey í føroyskum, fyri at nevna okkurt burtur úr rúgvuni.