Taka aftur ímóti ull í ár

Búnaðarstovan í Kollafirði tekur aftur í ár móti ull. 

Tikið verður ímóti ull frá 13. juli til 19. august, hósdag, fríggjadag og leygardag.

Er talan um størri nøgdir, er best at avtala tíð frammanundan. 

Ullin skal vera turr og nosslig og stungin í reinar posar, og hon verður góðskumett og avroknað eftir góðsku.

Tikið verður ikki ímóti vátari ull, og ull við skræpu ella málingarrestum í, pesjur, ull við ov nógvum mosa, bosi ella eyri í. Ull við eitt nú bótum, tráði og tílíkum verður somuleiðis vrakað. 

Tveir góðskuflokkar

Ullin verður skild í tveir góðskuflokkar, I. flokk og II. flokk.

Tøvd ull, hálsull o.tíl. verður avroknað í II. flokki. Somuleiðis verður ull við nakað av mosa o. líkn. avroknað í II. flokki.

Fyri ull í I. flokki verða latnar kr. 10,- fyri kg, íroknað MVG. Fyri ull í II. flokki verður latið kr. 1,50 fyri kg, íroknað MVG.

Er veitarin ikki MVG-skrásettur, verður prísurin tí ávikavist kr. 8,- og kr. 1,20 fyri kg.

Meira kann lesast á heimasíðuni hjá Búnaðarstovuni.