Treystital: Tilfeingisvinnan og handilsvinnan dapurskygdar

Vinnan er ikki so bjartskygd um framtíðarvánirnar, sum hon hevur verið. Hinvegin tykist vanligi føroyingurin ikki at vera so stúrin.

Hagstovan hevur júst kunngjørt treystitalið. Tað vísir, hvussu bjartskygd ella dapurskygd, borgarar ella vinnan eru.

Samanlagt lækkar treystitalið, og tað er serliga tí, at tilfeingisvinnan og handilsvinnan eru meira dapurskygd.

Betraðu væntanirnar hjá húsarhaldunum stava frá framgongdini í metingini um fíggjarligu støðuna hjá húsarhaldinum um eitt ár, sammett við í dag.

Heldur frægari

Eisini meta húsarhaldini búskaparstøðuna í Føroyum um eitt ár sammett við í dag at vera heldur frægari, men tó undir langtíðar miðalinum.

Av tí at húsarhaldini hava verið meira afturhaldin vegna stóra prísvøksturin seinasta árið, og selda nøgdin er minkað, er handilsvinnan ikki nøgd við gongdina og tí meira dapurskygd, enn hon hevur verið.

Treystið í tilfeingisvinnuni og øðrum ídnaði er fallið úr 8 niður -15. Fyritøkurnar vænta millum annað, at søluprísurin verður ikki so góður, sum hann hevur verið.

Byggivinnan er tó meira nøgd við støðuna, tí arbeiði er tryggjað rættiliga langt fram. Størsta avbjóðingin er tørvur á arbeiðsmegi.