Fyrsta venjing á tyrlupalli eydnaðist væl

Sum heild eydnaðist fyrsta venjingin á tyrlupalli í Føroyum væl.

Men nakrir vansar vóru hjá átakseindunum.

Avtalað er, at umboð fyri átakseindirnar, sum eru Atlantic Airways, Tyrludeildin, politiið, Sjúkrahúsverkið, Tvøroyrar sløkkilið og Landsverk, fara til sítt bakland og greiða frá niðurstøðum í eygleiðarafrágreiðingunum.

Venjingin var á tyrlupallinum í Froðba 23. mars.

Eldur í

Í venjingini skuldi tyrlan seta seg í Froðba, men eldur kom í tyrluna. 

Við vóru tveir flogskiparar og átta ferðafólk. Nógv fólk fingu skaða.

Endamálið við venjingini var at royna samskiftið og samstarvið partanna millum, og finna møguligar veikleikar og bøta um teir.

Tað er alneyðugt, at allir tilbúgvingarpartar brúka somu samskiftisútgerð, stendur í eftirmetingini.

Kima, samskiftisútgerðin hjá Føroya Tele, er eitt stórt framstig, men enn er brúk fyri justeringum á útgerðini, er ein niðurstøða.