Frágreiðingin um Russland: Skulu viðgera innlitsumbøn av nýggjum

Umboðsmaðurin hevur biðið Uttanríkis- og vinnumálaráðið taka eitt mál upp til nýggja viðgerð, har ein umsókn um innlit í frágreiðingina um viðurskiftini við Russland var sýtt.

Í fyrstu syftu varð einki innlit givið, men undir viðgerðini játtaði Uttanríkis- og vinnumálaráðið partvíst innlit.

Tá málið byrjaði, metti Uttanríkis- og vinnumálaráðið, at útflýggjan av skjalinum í síni heild kundi elva til týðandi skaða fyri uttanríkispolitisku áhugamál Føroya, m.a. samráðingarstøðu Føroya og viðurskiftini við onnur lond. 

Eisini metti ráðið, at atlitini, sum lógu til grund fyri at undantaka upplýsingarnar frá innliti í hesum føri, talaðu ímóti at geva meirinnlit.

Umboðsmaðurin var samdur við Uttanríkis- og vinnumálaráðnum um, at undir nevndu viðurskiftum var heimild at sýta fyri at lata innlit í alla frágreiðingina.

Tá fortreytirnar fyri at sýta innlitið broyttust, læt ráðið klagaranum partvíst innlit. 

russisk skip á Havnini, russisk skip, Tinganes

Frágreiðing er skrivað um viðurskiftini millum Føroya og Russland, men Umboðsmaðurin heldur ikki, at nóg nogv innlit er givið í frágreiðingina. Tí skal Uttanríkis- og vinnumálaráðið viðgera málið av nýggjum. (Savnsmynd: Bjarni Árting Rubeksen)

Ógreitt innlit

Umboðsmaðurin metti, at ráðið hevði sýtt innlit í óneyðuga nógv brot í frágreiðingini. Umboðsmaðurin vísti í hesum sambandi á, at brot í frágreiðingini innihildu upplýsingar um faktuell viðurskifti og alment atkomuligar upplýsingar, sum - nú atlitið at politisku avgerðartilgongdini ikki var aktuelt longur -  ikki kundu undantakast frá innliti vegna verju av uttanríkispolitiskum ella uttanríkisfíggjarligum áhugamálum.

Umboðsmaðurin staðfesti eisini, at innlitið var givið á ógreiðan hátt, og at feilir vóru í  innlitinum. 

T.d. var uppsetingin av upprunatekstinum broytt í fleiri støðum, tá teksturin var drigin út. 

Umboðsmaðurin hevur biðið Uttanríkis- og vinnumálaráðið um taka málið upp til nýggja viðgerð, og lata seg frætta, hvat víðari hendir í málinum. 

Les meira um málið her.

Hanna Vang

Hanna Vang er Løgtingsins umboðsmaður. (Savnsmynd)