Partabrævið í Bakkafrosti hækkar aftur

Partabrævið í Bakkafrosti er á veg uppaftur, eftir at tað fór knappliga 15 prosent niður mánadagin.

Orsøkin var helst tann, at Bakkafrost sunnudagin boðaði frá lakari úrsliti í øðrum ársfjórðingi enn áður hildið.

Tá keypsskálin læt aftur í gjár, var partabrævið hækkað 5,29 prosent.

Bakkafrost boðaði sunnudagin partaeigarunum frá, at rakstrarúrslitið í øðrum ársfjórðingi fyri rentur og skatt verður 353 milliónir krónur.

Orsøkin er, at minni var tikið, og laksurin vigaði minni.

Prísurin fyri feskan laks minkaði eisini.

Í Føroyum kostaði fellið 32 milliónir krónur og 43 milliónir í Skotlandi.

Endaliga úrslitið í øðrum ársfjórðingi kemur 22.august.