- Tíðindi, mentan og ítróttur
Summarfestival-skráin: Europe spælir fríggjakvøldið
Summarfestival-skráin: Europe spælir fríggjakvøldið
So er greitt, at stóra høvuðsnavnið á Summarfestivalinum, svenski rokkbólkurin Europe, spælir fríggjakvøldið á Summarfestivalinum. Skráin er nú tøk
Yvirhøvur er skráin til ársins Summarfestivali kanska ein tann frægasta í fleiri ár, hóast tú altíð gongur við einari kenslu av, at tað kundi verið fleiri nøvn á skránni, serliga útlendsk
Mynd: Ditte Mathilda Joensen / Veingir
26.07.2023 - 00:08
Summarfestvalurin verður fyriskipaður í Klaksvík frá hósdegnum 3. august til leygardagin 5. august.
Hesar tríggjar dagarnar bjóðar festivalurin gestunum 30 konsertir við fimm úlendskum og 25 føroyskum tónleikanøvnum.
Skráin er tøk, og nú er greitt, at alt yvirskuggandi høvuðsnavnið á Summarfestivalinum í ár, svenski rokkbólkurin Europe, fer á stóra pallin á Vágsbøi fríggjakvøldið 4. august klokkan 22.
Samanumtikið er fríggjakvøldið á Summarfestivalinum í ár rættiliga sterkt tónlistarliga.
Umframt Europe, so eru Hanus G., Hamradun, Vágaverk og Jens Marni Hansen eisini á skránni hetta kvøldið.
Ein tann frægasta skráin
Yvirhøvur er skráin til ársins Summarfestivali kanska ein tann frægasta í fleiri ár, hóast tú altíð gongur við einari kenslu av, at tað kundi verið fleiri nøvn á skránni, serliga útlendsk.
Danski bólkurin Jonah Blacksmith, ið fer á pallin sunnunáttina klokkan tvey, er eitt spennandi navn, ið seinasta árið hevur hittað við frálíka poppsanginum "House On Fire".
Harumframt eru nøkur av sterkastu føroysku nøvnunum í løtuni eisini á Summarfestival-skránni, eitt nú Marius Ziska, RSP, Reiley og Guðrið Hansdóttir, sum vann FMA-heiðurslønir fyri bæði "Ársins útgávu" og "Ársins tekst".
Úr gloymskuni
Men eingin Summarfestivalur uttan at fyriskipararnir hava grivið okkurt tónleikanavn fram úr gloymskuni.
Í ár eru tað 73 ára gamla Suzi Quatro úr USA, ið hittaði stórt í sjeytiárunum við sínum bassi, og 60 ára gamli Thomas Anders úr týska bólkinum Modern Talking, ið hinvegin hittaði stór í áttatiárunum.
Tað er altíð ein ávísur váði samantvinnaður við at hála sovorðin nøvn upp úr gloymskuni og út á pallin, tí hvussu eru tey í roynd og veru fyri at framføra?
Summarfestivalurin hevur onkur ræðudømir at vísa á í so máta. Hóast Robin Gibb úr Bee Gees nokk er kendasta navnið, ið hevur spælt á Summarfestivalinum, so er tann konsertin farin í søguna sum eitt dømi um, hvussu galið tað kann ganga.
Livst, so spyrst!
Um nakar ivast í, hvussu limirnir í Europe eru fyri, so fæst sjón fyri søgn HER.
Er kopiera
Nýggjastu sendingar í ÚV
Nýggjastu sendingar í SV
