Tríggjar krónur komnar aftrat kostnaðinum

Framleiðslukostnaðurin hjá alivinnuni er 42,22 kr. fyri kilo í august og september.

Hann er ásettur við grundarlagi í roknskapartølum fyri 2022.

Hetta stendur í kunngerð frá Vinnumálaráðnum.

Loyvisgjaldið hjá alivinnuni verður ásett eftir framleiðslukostnaðinum.

Hækkar stigvíst

Gjaldið verður ásett eftir einum stiga, har sum prísirnir eru hin parturin.

Eru prísirnir minni enn framleiðslukostnaðurin er gjaldið hálvt prosent.

Síðani hækkar gjaldið alt eftir, hvussu nógv størri enn framleiðslukostnaðurin prísirnir eru. 

Størsta gjaldið er 20 prosent.

Higartil í ár hevur framleiðslukostnaðurin verið 39,15 kr. fyri kilo.

Hann byggir á roknskapartøl frá 2021.