Integratiónslógin skal tryggja at tamarhald er á tilflytingini

Integratiónslógin, sum eftir ætlan verður løgd fyri tingið til várs, skal tryggja, at vit ikki missa tamarhaldið á tilflytingini, sigur Bjarni Kárason Petersen, landsstýrismaður í lógarmálum.

Løgmaður segði í ólavsøkurøðu síni, at vit ikki mugu "missa tamarhaldið", men tryggja javnvágina millum rættindi og skyldur teirra, sum koma til Føroya.

Talið á útlendingum, sum komu til Føroya sum samfylgjandi við fólkum, ið komu her at arbeiða, var í fjør 118. Tað eru 70 fleiri enn í 2021, tá snarskipanin (fast track) varð sett í verk.

Tað vísa tøl frá donsku Udlændingestyrelsen og Styrelsen for International Rekruttering og Integration (SIRI).