Føroya arbeiðsgevarafelag: Hvat fara integratiónsátøk at kosta vinnuni?

Føroya arbeiðsgevarafelag saknar eina neyvari meting, sum sigur, hvussu nógv tiltøkini í uppskoti landsstýrisins um integratiónslóg kosta hvørt sær.

Hendan meting eigur at verða gjørd, áðrenn uppskotið verður lagt fyri løgtingið, sigur arbeiðsgevarafelagið, sum annars tekur undir við ætlanini at styrkja integratiónina.

Í uppskotinum stendur, at roknast kann við, at skyldur í sambandi við integratión fara at vera lagdar á vinnuna, hóast tað ikki er við í uppskotinum, sum nú er gjørt. 

Arbeiðsgevarafelagið mælir til, at Føroya arbeiðsgevarafelag verður spurt í góðari tíð, um ætlanir eru at áleggja vinnuni serligar skyldur.

Kravið um arbeiðstímar má broytast

Felagið sigur, at væleydnað integratión krevur eisini broytingar í útlendingalógini.

Millum annað forðar kravið í útlendingalógini um, at fólk úr triðjalondum skulu arbeiða 40 tímar um vikuna, fyri málundirvísing, tí stundir eru ikki til hennara.

Tí er neyðugt at gera broytingar, so kravið um arbeiðstímar hjá fólki úr triðja londum verður javnsett við arbeiðskravið til ES-borgarar, tað eru 30 tímar um vikuna, siga arbeiðsgevarar.

Ella kunnu undirvísingartímar í føroyskum telja við í teimum 40 tímunum, sigur Arbeiðsgevarafelagið.