Byrjar spakuliga at fjara í Norra

Nú byrjar spakuliga at fjara í Norra eftir ógvusligu vatnflóðina, sum rakti ymsastaðni kring landið.

Vatn er farið upp um áarbakkarnar, vegir og brýr eru farnar, hús eru farin ella hava fingið stóran skaða, og myndugleikarnir fluttu nógv fólk burtur, tí vandi var fyri áarlopi. Í nøkrum støðum er framvegis vandi á ferð, og boðað verður frá meira regni í morgin, serliga á eysturlandinum.

Nú eru fleiri av fólkunum, sum vóru flutt heimanífrá, sloppin heimaftur. Men tó ikki øll. Umleið helvtin av teimum, sum vóru flutt burtur úr býnum Hønefoss, sum var serliga hart raktur, eru nú sloppin heimaftur. Men 1054 fólk eru framvegis ikki sloppin heimaftur og búgva á hotellum, tí vandin er ikki heilt av enn. Enn er óvist, nær hesi sleppa heimaftur, skrivar NRK.

Fleiri vegir hava verið stongdir, men teir flestu eru nú latnir upp aftur. Tokini koyra tó ikki allastaðni enn.