641 fólk løgdust aftrat seinasta árið

Fólkatalið vaks 641 fólk frá august í fjør til august í ár, og nú búgva 54. 738 fólk í Føroyum, vísa tøl hjá Hagstovuni.

Vøksturin er 1,2 prosent, eitt vet størri enn undanfarna 12 mánaða skeið.

Fyrr vóru tað danskir ríkisborgarar, sum umboðaðu fólkavøksturin, men nú er gongdin tann, at meginparturin av teimum, sum leggjast aftrat, hava annan ríkisborgaraskap enn danskan.

86 prosent av teimum, sum løgdust aftur at fólkatalinum seinastu tvey árini, høvdu ikki danskan ríkisborgaraskap.

Seinasta árið hevur burðaravlopið verið 197 fólk, og nettotilflytingin hevur verið 444 fólk. 

Størsti fólkavøksturin hevur verið í Tórshavnar-, Runavíkar- og Klaksvíkar kommunu.