Ársins íverkseti í fjør - hevur framvegis stórt hall

Tá fyritøkan Globe Tracker var kosin “Ársins íverkseti” fyri einum ári síðani, var sagt, at felagið var fremst í heiminum innan sítt øki.

Hetta endurspeglast tó ikki á botnlinjuni.

Higartil eru umleið 220 milliónir - harav nógvar milliónir frá føroyskum pensjóns- og tryggingaruppsparingum - settar í tvey ymisk Globe Tracker-feløg, men við árslok 2022 høvdu bæði feløgini stóra skuld, skrivar Frihedsbrevet.fo.

“Globe Tracker hevur megnað at flyta seg frá at vera ein íverksetarafyritøka, til at koma í framleiðslu og endað við at vera fremst á marknaðinum fyri sporing av reefer-bingjum”. 

Tað segði Joel undir Leitinum, táverandi nevndarformaður og núverandi stjóri, tá Globe Tracker var kosið “Ársins íverkseti” á Íverksetaradegnum í fjør. 

Joel undir Leitinum

Joel undir Leitinum er stjóri í Globe Tracker. 

Krevur tol

“Tað krevur “tolnar pengar”, tá tú byggir nakað upp”, sigur Jan Jakobsen, stjóri í Lív og nevndarformaður í Globe Tracker við Frihedsbrevet.fo.

Í sambandi við virðislønina var eisini sagt, at Globe Tracker hevur væl oman fyri 100.000 loysnir, sum eru settar í bingjur kring heimin, og at hetta talið væntandi fer at fleirfaldast næstu árini.  

Frihedsbrevet.fo skrivar, at alt bendir á, at TF Holding tordi ikki at seta meira pening í verkætlanina, tí TF Íløgur var ikki partur av nýggja felagnum. Tað vóru Lív og Norðoya Íløgufelag hinvegin. Harumframt komu Framherji, Smyril Line og Arbeiðsmarknaðareftirlønargrunnurin inn sum nýggir partaeigarar.

Globe Tracker hevur havt fýra stjórar og fimm nevndarformenn seinastu sjey árini, og ongin teirra hevur enn megnað at fáa annað enn reyð tøl á botnlinjuna, skrivar Frihedsbrevet.fo.