Til reiðar til Nations League

Nýggjur venjari og nýggj kapping.

Føroyska fótbóltslandsliðið við kvinnum er farin undir fyrireikingarnar til sín fyrsta Nations League-dyst ímóti Montenegro fríggjakvøldið, og nýggi venjarin, Signe Pries Andersen, gleðir seg til uppgávuna.

 - Tað er ein spennandi avbjóðing, og vónandi megna vit at spæla eins væl og mótstøðuliðið og fáa stigini eisini, sigur danski venjarin, sum avloysti Lene Terp í juni.

 - Vit leggja okkum eftir góðum verjuspæli, sum vit vónandi fáa vant hesa vikuna, men eg vóni eisini, at vit klára at hótta við álopsspælinum.


Hóskandi kappingarleistur

Føroysku kvinnurnar hava havt tað trupult í EM og HM-undankappingum síðstu árini, og bóltkringi miðvallarin, Eyðvør Klakstein, gleðir seg til at spæla ímóti Montenegro og Kýpros, og seinni ímóti Aserbadjan. 

Føroyar hava vunnið ímóti Montenegro fyrr, meðan tær ikki hava spælt ímóti hvørki Kýpros ella Aserbadjan, men royndi KÍ-spælarin ivast ikki í, at Nations League-leisturin hóskar betur til føroyska liðið.

 - Eg vóni, at vit kunnu hava bóltin eitt sindur, og tað liggur sjálvandi betur til mínar styrkir. Tað er eisini stuttligari hjá áskoðarunum at hyggja at, sigur Eyðvør Klakstein.

 - Vit eru styrkismettar niðast, so hvussu líka mikið hvat, skulu vit standa á tá, fyri at fáa stig burturúr. Tá tað er sagt, ivist eg ikki í, at vit fara at menna okkum nógv, sigur Signe Pries Andersen.
 

Dystarskráin, Nations League:

22. september: Føroyar – Montenegro (Tórsvøllur)
26. september: Kýpros – Føroyar
27. oktober: Føroyar – Aserbadjan (við Djúpumýrar)
31. oktober: Føroyar – Kýpros (Tórsvøllur)
1. desember: Montenegro – Føroyar
5. desember: Aserbadjan – Føroyar